DANGDUT ACADEMY ASIA 3: KONTESTANTE HUSI TIMOR-LESTE HALO REJISTU HISTORIKU

132
ALDA DE ALMEIDA, KONTESTANTI TIMOR OAN NEBE HETAN VALOR AAS LIU IHA GRUPU 4

(boletim24.com) – Kompetisaun Dangdut Academy Asia 3 nebe organiza husi kanal televizivu Indonesia nian, Indosiar, hahu tiha ona iha loron 24 Outubru liu.

Kompetisaun muzika dangdut nee partisipa husi nasaun sira hanesan Indonesia nudar uma nain, Timor-Leste, Malasya, Thailandia, Singapura no Brunei Darusalam.

Timor-Leste rasik hahu partisipa iha eventu dangdut nivel Asia nee iha tinan 2016 liu husi artista nain 6, iha nebe Maria Vitoria mak konsegue hakat too top 4.

Kompara ho tinan kotuk, tinan ida nee, partisipasaun Timor-Leste nian iha progresu boot tamba artista nain neen nebe mak reprejenta rai doben ida nee konsegue hakat hotu ba faze Top 30.

Iha tinan 2016, husi partispantes nain 6, Maria Vitoria no Gerson Oliveira deit mak hakat ba faze Top 30 no Marvi mak ikus mak konsegue too faze Top 4, no iha sorin seluk Dora, Lola Cansio, Jerry kong no Araujo tenki sai sedu iha faze Top 36.

Ba tinan ida nee, Mariana Neno, Atanazio Sarmento, Rafael Tilman, Alda de Almeida, Joaquim Soares, no Deometrio Benevides hotu-hotu hatudu atuasaun espetakular no merese hakat ba faze Top 30.

Husi artista Timor Oan nain 6 nee, Alda de Almeida mak konsegue halo historia furak iha partisipasaun Timor-Leste nian tamba iha ninia grupu konsegue hetan valor nebe aas liu, husi juri hodi halakon kontestante favoritu husi Indonesia no Malasya.

Kompetisaun ba faze Top 36 remata ona, no iha loron 30 Outubru, sei hahu ho faze Top 30.

kontestanti Mariana Neno mak sei hahu atuasaun iha faze nee, no ita hotu hein katak Neno bele hakat tan ba faze tuir mai.

FO KOMENTARIU