Jose Mourinho Sofre Lakon Dahuluk Iha Premier League

32

(boeltim24.com) – Klubu famozu husi sidade Manchester, Inglatera, Manchester United, nebe treina husi treniador portugues, Jose Mourinho, sofre lakon ba dahuluk iha Premier League epoka ida nee nian.

Red Devil lakon hasoru ekipa nebe mak foin promove ba eskalaun 1 Liga Ingleza, Huddersfield, iha jornada 9 ho skor 2-1.

Huddersfielfd nebe mak nudar uma nain ba jogu nee hetan ona vantajen golu rua wainhira jogu foin mak halao duranti minutu 33 primeira parte nian.

Jogador Mooy fo vantajen dahuluk ba ekipa uma nain iha minutu 28, molok Depoitre aumenta vantajen ba 2-0 iha minutu 33.

Maske Manchester united domina pose bola maibe lakonsegue hamenus desvantajen nee too tempu intervalu.

Iha segunda parte, MU kontinua halo atakes oin oin ba grande area Huddersfield nian maibe seidauk bele marka golu.

Golu nebe mak ekipa Mourinho nian nee presija tebes, ikus mai marka duni husi jogador Rashford iha minutu 78 hodi fo anin fresku ba nia ekipa atu pelu menus bele halo impata jogu.

Maibe, tristi ba MU no Jose Mourinho tamba ekipa uma nain disiplina tebes no konsegue asegura vantajen mihis nee too jogu remata.

Ho rejultadu ida nee, MU provizoriamente kontinua okupa pozisaun 2 ho total pontu 20 iha klasifikasaun nebe kontinua lidera husi ekipa sidade Manchester seluk, mak Manchester City.

Man City nebe manan Burnley 3-0 iha jornada 9 nee totaliza ona pontu hamutuk 25, liu pontu 5 ba Manchester United.

FO KOMENTARIU