ANC IMPLEMENTA REGISTRASAUN OBRIGATORIU BA KLIENTI KOMUNIKASAUN HOTU-HOTU

99

(boletim24.com) – Autoridade Nacional Comunicacao (ANC), orgaun reguladora ba setor komunikasaun nian, hahu servisu hamutuk ona ho operador tolu nebe halao operasaun iha Timor-Leste – Timor Telecom, Telkomcel no Telemor – hodi implementa dekretu governu nian kona ba rejistrasaun sim card pre-pago.

ANC liu husi publiksaun video, husu ba klienti tuan (klienti nebe iha ona sim card pre-pago) atu halo rejistrasaun ou atualiza fila fila dadus ho dokumentu espesifiku iha ida idak ninia operador.

Se karik klienti nia Kartaun Pre-pago nebe uza dau daun, duranti nee hola iha Kios ou luron ninin, nebe la uza dokumentu identidade maka kleinti nee iha obrigasaun hodi hakat ba loja ou fatin atendimentu publiku husi operador refere hodi rejista fila fali ninia sim card pre-pago nee.

Klienti foun nebe foin mak atu sosa sim card pre-pago presija mos kompleta dokumentus espesifiku molok utiliza servisu husi kartaun telemovel pre-pago.

Ba sidadaun Timor-Oan ho idade 18 ba leten sei halo rejistu ho dokumentu hanesan, Bilheti Identidade (BI) ou Kartaun Eleitoral, no ba joven sira nebe seidauk iha BI no Kartaun Eleitoral bele halo rejistu uza Kartaun Estudanti no Sertidaun Moris.

Ba sidadaun estranjeiru sei presija dokumentu sira hanesan Passaporte ka Kartaun Rezidenti RDTL.

Loron ikus rejistrasaun nian ba klienti tuan husi operador ida idak mak 29 Dezembru 2017, nunee iha obrigatoriu atu halo rejistrasaun ba ida idak nia Sim Card Pre-Pago molok too loron refere.

Tamba tuir publikasuan husi ANC nee katak, hahu husi loron 30 Dezembru 2017, Sim Card Pre-Pago sira nebe la rejistu iha ida idak ninia operador sei hamate permanenti nunee sei la bele utiliza tan ona.

Nunee mos, ema ida bele halo rejistu ou sai nain ba kartaun Pre-pago maximu hamutuk neen (6).

“ANC implementa politika Governu nian hodi bele proteje privasidade husi konsumidor ida idak”, dehan Prezidenti ANC, Antonio Correia, iha publikasaun video.

“Mai ita rejista Kartaun Sim Pre-Pago ida idak nian hodi kontribui ba servisu informasaun iha ita nia rai nebe responsavel no seguru”, prezidenti ANC bolu atensaun ba sidadaun hotu-hotu.

KETA HALUHA AVIZU IDA NEE MALUK SIRA HOTU!!!

FO KOMENTARIU