Sporting Clubo Timor Taka Primeira Volta Ho Rejultadu Negativu

34
Line-ups Sporting Clubo Timor nebe laon 1-5 hasoru Lica Lica FC | Imajen: LFA

 

(boletim24.com) – Sporting Clubo Timor nia posibilidade atu bele promove ba divizaun 1 sai todan liu tan, wainira iha jogu ikus ba primeira volta nian lakon ho Lica lica FC ho skor 1-5.

Sporting Timor seidauk manan fali jogu hafoin iha jogu dahuluk ba divizaun 2 nian manan AD Uniao ho sor 5-1.

Hahu husi neba, Sporting impata 0-0 hasoru Aitana FC, lakon 0-3 hasoru Assalam FC, impata 1-1 hasoru Atletico Ultramar, lakon 1-2 hasoru YMCA no ikus liu lakon ho Lica Lica FC 1-5.

Sporting kompleta ona jogu 6 ba primeira volta nian, iha jogu ikus hasoru Lica Lica FC nebe halao iha oron 26 Abril 2017 iha Estadio Municipal Dili.

Lica Lica hahu lidera jogu iha minutu 14 liu husi golu nebe marka husi jogador Manuel Carmo, molok Clementino Vicenti marka golu daruak iha minutu 21 no Nelson Adelino marka golu datoluk iha minutu 42 hodi tulun klubu husi VIkeke nee lidera jogu 3-0 too tempu deskansa.

Sporting Timor konsegue hamenus diferensa golu ba 1-3 liu husi golu nebe mak jogador Domingos Pires marka iha minutu 71.

Maibe, inves Sporting halo impata jogu, Lica Lica mak hanaruk fali vantajen liu husi golu rua nebe mak marka husi jogador Evanio de Jesus iha minutu 76, no golu seluk marka dala ida tan husi Manuel Carmo iha minutu 78, hodi kompleta rejultadu final 5-1 ba Lica Lica FC.

Ida nee nudar pontu 3 dahuluk nebe klubu VIkeke nee hetan liu husi jogu tolu nebe halao ona.

Maske manan, Lica Lica kontinua okupa pozisaun 6 ho total pontu 3.

Iha sorin seluk, Sporting nebe kompleta ona jogu 6 primeira volta nian, kontinua provizoriamente okupa pozisaun 3 ho pontu 5.

Maibe iha posibilidade boot atu tun ba pozisaun zona mean nian tamba Aitana FC, Lica Lica no AD Uniao foin mak halao jogu 3, no YMCA foin mak halao jogu 4.

FO KOMENTARIU