Nagardjo FC Manan Sport Dili Benfica Ho Skor 6-0

58

 

(boletim24.com) – Nagardjo FC kontinua hamoris nafatin ninia posibilidade atu promove ba divizaun 1 hafoin iha jogu ba dala haat hasoru Sport Dili Benfica manan ho skor boot 6-0, iha jogu nebe alao iha loron 25 Abril iha Estadio Municipal Dili.

Ida nee ba dala tolu ona mak klubu husi Marconi nee manan iha jogu haat nebe partisipa ona, manan DIT FC 3-0 iha jogu abertura, manan Cafe FC 3-2 iha jogu dala tolu nian, no jogu dala haat manan Benfica Dili 6-0.

Nagardjo hahu goleada nee ba Benfica Dili liu husi jogador Apolinario de Jesus nebe marka golu dahuluk iha jogu iha minutu 12.

Abrao do Carmo aumenta vantajen Nagardjo FC nian ba 2-0 iha minutu 22, no rejultadu ida la muda too tempu deskansa.

Nagardjo FC aumenta tan golu 4 ba redi Benfica nian liu husi jogador Editaka Kamimura, Abrao da Costa no Izaquel Kofi.

Jogador tasi-balu Kamimura marka golu iha minutu 50, hodi hanaruk vantajen Nagardjo nian ba 3-0.

Abrao da Costa marka golu ba redi Benfica nian iha minutu 81 hodi muda skor provizoriu ba 4-0, molok Izaquel KOfi muda sor ba 5-0 liu husi golu nebe nia marka iha minutu 87.

Dala ida tan, Abrao da Costa marka tan golu ida iha minutu 90 hodi kompleta rejultadu final 6-0, hodi tulun klubu Marconi nian nee hetan tan pontu 3 nebe importanti tebes.

Ho rejultadu ida nee, Nagardjo okupa hikas pozisaun 1 iha klasifkasaun Pool A nian ho pontu 10, liu deit pontu ida ba DIT FC iha pozisaun 2.

Iha sorin seluk, Benfica seidau manan jogu ida maske partisipa ona jogu 3, nunee seidauk hetan pontu.

FO KOMENTARIU