Manan AD Uniao 4-1, Assalam FC Provizoriamente Lidera Klasifikasaun Pool B

61

 

(boletim24.com) – Assalam FC provizoriamente lidera klasifikasaun Pool B nian hafoin iha jogu dala 5 nian nebe halao iha loron 27 Abril 2017 iha Estadio Municipa Dili hasoru AD Uniao manan ho skor 4-1.

Ida nee ba dala 4 tui tuir malu ona mak Marcos Horizon ho nia kolega sira manan jogu iha divizaun 2 nian, wainihira lakon 1-2 iha jogu dahuluk hasoru Atletico Ultramar.

Domingos da Silva mak marka golu uluk iha jogu nee , iha minutu 15, hodi fo vantajen ba Asslam FC, maibe AD Uniao konsegue halo impata jogu iha minutu 30 liu husi jogador Silvestre Gusmao.

Nunee too tempu deskansa, jogu impata ho skor provizoriu 1-1.

Tama ba segunda parte, Nazrudin mosu nudar ‘heroi’ wainhira mara golu 2 sedu hodi fo vantajen ba nia klbu, muda skor provizoriu ba 3-1.

Nazrudin marka golu dahuluk iha minutu 53 no golu daruak nian marka iha minutu 55.

Husein Ramos kompleta rejultadu final 4-1 liu husi golu nebe mak nia marka ba redi AD Uniao iha minutu 60.

Ho rejultadu ida nee, Assalam FC provizoriamente lidera klasifikasaun Pool B nia ho pontu 12 husi jogu 5 nebe halao ona, liu deit pontu 2 ba Atletico Ultramar iha pozisaun runner up ho pontu 10 no foin mak halao jogu 4.

Iha sorin seluk, AD Uniao kontinua tur iha pozisaun ikus liu ho pontu 1, rejultadu husi lakon dala rua (lakon 1-5 hasoru SPorting TImor iha jogu dahuluk no lakon 1-4 hasoru Asslam iha jogu datoluk nee), no impata dala ida iha jogu hasoru YMCA ho skor 3-3.

FO KOMENTARIU