Real Madrid Publika Video Hodi Hatudu Desizaun Balu Husi Arbitru Nebe Mos Ajuda Bayern Munchen

79

Arbitru Kassai foti desizaun LALOS hasoru ekipa rua hotu, maibe Bayern Munchen la aproveita ho didiak ajuda husi arbitru nee, enkuantu Real Madrid aproveita tebes ho diak erru husi arbitru Kassai

(boletim24.com) – Jogu segunda-maun quartos-final Champions League entre Real Madrid hasoru Bayern Munchen hamosu deskontentamentu husi adeptus no entidade futebol barak iha mundu, liu liu jogador no dirijenti husi ekipa Alemanha nee.

Tuir sira katak desizaun husi arbitru Hungaria Viktor Kassai nebe fo kartaun mean ba Arturo Vidal no valida golu rua ikus husi Ronaldo nebe iha pozisaun ‘off-side’ prejudika Bayern Munchen no ajuda Real Madrid hodi hakat ba semi-final.

Maibe, liu husi video nebe Real Madrid publika iha media social, hatudu katak iha mos desizaun balu husi arbitru Kassai nebe mos ajuda tebes Bayern Munchen.

Tuir publikasaun nee katak, arbitru Kassai foti desizaun LALOS hasoru ekipa rua hotu, maibe Bayern Munchen la aproveita ho didiak ajuda husi arbitru nee, enkuantu Real Madrid aproveita tebes ho diak erru husi arbitru Kassai.

Iha video nee, Real Madrid fo evidensia kona ba momentu balu husi jogu nebe arbitru nee foti dezisaun lalos hasoru Real Madrid, hanesan tuir mai:

  1. Iha minutu 5 wainhira Arturo Vidal hamonu Isco husi kotuk arbitru fo kartaun kinur deit, maibe tuir lolos tenki fo kedas ona kartaun mean.
  2. Iha minutu 27 wainhira Real Madrid hetan oportunidade hodi marka kantu, Xavi Alonso hakuak no dada monu Sergio Ramos iha grande area Bayern Munchen nian, tuir lolos arbitru tenki fo premiu penalty ba Real Madrid tamba Xavi nia hahalok ida nee.
  3. Iha minutu 48 wainhira Arturo Vidal halo falta todan ba Casemiro, tuir lolos arbitru fo ona kartaun kinur daruak ba jogador nee maibe Kassai la fo sansaun ruma ba nia.
  4. Iha minutu 51 Arjen Roben monu iha grande area Real Madrid nian, maske Casemiro la fo presaun fiziku makaas ba Roben maibe arbitru marka penalti nudar premiu ba Bayern Munchen
  5. Arturo Vidal halo tan falta hasoru Isco nebe tuir lolo arbitru fo ona kartaun kinur daruak, maibe la fo nafatin ba jogador Chile nee.
  6. Iha minutu 69 Arbitru marka off-side ba Ronaldo nebe halo atake ba area Bayern Munchen, maske husi video hatudu katak pozisaun Ronaldo nian la off-side.
  7. Iha minutu 77, Lewandowski nebe iha pozisaun off-side simu bola pasajen husi nia kolega ekipa nebe halo Sergio Ramos marka auto-golu hodi muda skor ba 1-2.
  8. Iha minutu 97, Boateng halo falta todan ba Casemiro iha grande area, hanesan o falta nebe Casemiro halo ba Roben ia minutu 51 nee,  maibe arbitru la marka penalty ba Real Madrid

Pontu sira iha leten mak tuir publikasaun iha video nee nudar erru sia nebe arbitru Kassai halo hasoru Real Madrid, aumenta tan ho erru husi arbitru iha jogu primeira-maun iha Alianz Arena nebe marka penalty ba Bayern Munchen maske bola nebe Frank Ribery xuta iha momentu neba la kona jogador Madrid Carvajal nia liman.

Bele hare deit iha video tuir mai hodi foti onkluzaun mesak:

FO KOMENTARIU