La Iha Milagre Ba Daruak, Juventus Nia Muru Metin Liu No Barcelona Elimina Ona Husi UEFA Champions League

41

(boletim24.com) – Barcelona ninia prejensa iha UEFA Champions League dala ida tan too ona nia rohan iha faze quartos-final hafoin hetan deit rejultadu impata 0-0 hasoru Juventus iha jogu segunda-maun nebe halao iha Camp Nou iha loron 20 Abril madrugada OTL.

Barcelona elimina husi Champions League epoka 2016/2017 hafoin lakon ho agregadu 0-3 hasoru klubu jiganti husi Italia, Juventus.

Juventus konsegue neutraliza trio atakanti MSN (Messi, Suares no Neymar) iha jogu rua nebe halao iha faze quartos-final nee.

Barcelona lakonsegue fura muru forti nebe kompostu husi trio Giorgio Chiellini, Leonardo Bonucci no Andrea Barzagli.

Barcelona konsegue produz remontada hasoru PSG iha faze oitavo-final, lakon 0-4 iha Fransa no manan 6-1 iha Camp Nou, maibe miligra la akontese dala rua nunee treinador Barcelona Luis Henrique tenki simu realidade katak muru husi Juventus forti liu kompara ho PSG nian.

Juventus nia dezempenhu hasoru Barcelona iha jogu rua nee halo kapitaun Gianluigi Buffon senti hakfodak tamba guarda-redi veteranu nee la imajina atu bele produz clean sheet iha jogu rua hasoru Barcelona, liu liu jogu segunda-maun iha Camp Nou.

“Hau hanoin katak ami iha opurtunidade boot hodi hakat ba semi-final hafoin manan 3-0 iha primeira-maun, maibe hau la imajina katak ami sei mai iha Camp Nou no produz clean sheet. Wainhira klubu ida hasoru adversariu hanesan Barcelona, sempre iha posibilidade atu sofre golu 1 ou 2, maibe ohin ida nee la akontese”, Buffon kualia ba media Mediaset Premium no RSI.

“Wainhira ami konsegue hapara Barcelona hodi la marka golu duranti minutu 180 (refere ba jogu rua hasoru klubu katalaun nee) iha jogu futebol, nee dehan katak ami nia ekipa solidu duni”, guarda-redi famozu nee dehan tan.

Hafoin sai kampiaun ba kompetisaun milionariu nee iha epoka 2014/2015, manan 3-1 iha final hasoru Juventus, ida nee ba dala rua tui tuir malu ona mak Barcelona elimina iha faze quatos-final.

FO KOMENTARIU