Cristiano Ronaldo Marka Hat-Trick, Real Madrid Hakat Ba Semi-Final Dala Hitu Tui TUir Malu

29

(boletim24.com) – Cristiano Ronaldo marka hat-trick hodi lori Real Madrid hakat ba semi-final ba dala hitu tui tuir malu.

Ho hat-trick ida nee, Cristiano liu nudar jogador dahuluk nebe hakat liu ona bareira golu 100 iha kompetisaun UEFA nian.

Duranti tinan 10 nia laran, Ronaldo marka ona golu 103, liu golu 6 ba Messi nebe marka ona golu 97 iha kompetisaun UEFA nian hamutuk ho Barcelona.

Cristiano hahu marka golu iha kompetisaun UEFA nian wainhira sei joga ia Manchester United, no golu dahuluk nian jogador portugues nee marka hasoru AS ROma, wainhira MU manan ho skor 7-1.

Bayern Munchen hahu hamoris esperansa wainhira avansadu Robert Lewandowski marka golu liu husi xuta penaltu iha minutu 53 wainhira Casemiro halo falta ba Arjen Roben iha grande area laran.

Iha minutu 76, Cristiano Ronaldo hatudu aan hodi halo impata jogu ba 1-1 no muda agregadu ba 3-2, molok kapitaun ekipa Sergio Ramos produz auto-golu estranhu hodi muda agregadu ba 3-3.

Too minutu 90, rejultadu 1-2 ba Bayern Munchen la muda, no jogu teni kontinua ba tempu prolongamentu tamba agragadu 3-3.

Cristiano Ronaldo marka golu daruak iha minutu 105 no arbitru valida golu nee maske jogador nee nia pozisaun off-side.

Dala ida tan Cristiano marka golu duvidozu iha minutu 110 liu husi asistensia furak nebe oferese husi Marcelo.

Cristiano nia golu rua ikus nee no desizaun arbitru fo kartaun mean ba Arturo VIdal mak hetan kontestasaun makaas husi adeptus no entidade futebol tomak, liu liu husi jogador no dirijenti Bayern Munchen nian no konsidera arbitru ‘ajuda’ Real Madrid halakon Bayern Munchen.

Asensio liu husi jogada individual furak marka golu furak hodi kompleta skor final ba 4-2, agregadu 6-3.

Ses husi desizaun kontrovesu sira nebe arbitru halao duranti jogu segunda maun iha Estadio Santiago Bernabeu, Real Madrid rejista historia nudar klubu nebe mak hakat ba faze semi-final Champions League tinan 7 tui tuir malu.

Real Madrid mos sei iha posibilidade atu rejista tan rejistu foun nudar klubu nebe sai kampiaun ba Champion League dala rua tui tuir malu se karik manan kompetisaun milionariu iha tinan nee.

FO KOMENTARIU