Sofre Desvantajen Dala Rua, Real Madrid Konsegue Manan Sporting Gijon

33

(boletim24.com) – Real Madrid konsegue hetan pontu 3 importanti hodi hametin ninia pozisaun iha klasifikasaun LA LIGA nian, agora ho pontu 75, hafoin manan Sporting Gijon o skor 3-2.

Treinador Real Madrid nian, Zinedine Zidane la hatun jogador importanti hanesan Cristiano Ronaldo, Bale (sofre hela lezaun), Benzema, Casemiro (tama fali iha minutu 89), Marcelo (tama fali iha minutu 57 no fo asistensia ba golu manan nian), Kroos, no Modric hodi poupa ba jogu segunda maun Champions League hasoru Bayern Munchen.

Ho mudansa nebe treinador halo, Real Madrid sofre desvantajen dala rua duranti jogu nee, molok Isco marka golu manan nian hafoin minutu 90.

Sporting Gijon marka uluk golu iha minutu 14 liu husi jogador Duje Cop, molok Isco halo impata jogu iha minutu 17.

Too tempu deskansa, rejultadu nafatin 1-1.

Tama ba segunda parte, dala ida tan Sporting Gijon lidera fali jogu wainhira jogador Mikel Vesga marka golu iha minutu 50.

Real Madrid dala ida tan konsegue impata jogu liu husi jogador avansadu Alvaro Morata iha minutu 59, hodi muda skor ba 2-2.

Jogu parese atu impata 2-2 ona tamba rejultadu ida nee la muda too minutu 90.

Maibe, sorti ba Real Madrid, tamba Isco dala ida tan mosu nudar heroi hodi marka golu manan nian hafoin minutu 90, liu husi assist nebe mak oferese husi jogador Casemiro nebe mak treinador hatama iha minutu 89.

Ho rejultadu ida nee, Real Madrid totaliza ona pontu 75, barak liu pontu 6 ba Barcelona nebe sei joga iha domingu madrugada hasoru Real Sociedad.

FO KOMENTARIU