Manan YMCA 7-0, Assalam FC Dudu Tun Sporting Timor Ba Pozisaun 3 Iha Tabela Klasifikasaun

38

Eis Guarda-Redi Selesaun Indonesia Nian nebe agora dau daun joga iha Assalam FC, Marcos Horizon La Sofre Golu Iha Jogu Rua Tui Tuir Malu.

(boletim24.com) – Assalam FC kontinua hatudu jogu furak no akumula nafatin pontu 3 iha kada jogu nebe partisipa.

Iha jogu ba jornada tolu nian hasoru ekipa ‘fraku’ YMCA, Marcos Horizon ho nia kolega sira manan ho skor boot 7-0.

Assalam FC lidera jogu ho skor provizoriu 2-0 ho tempu deskansa, liu husi golu nebe marka husi Isac Neto iha minutu 32, no golu seluk nebe marka husi jogador Nazrudin iha minutu 37.

Tama ba segunda parte, foin mak jogu komesa, Deni Susilo aumenta ona vantajen ba 3-0 iha minutu 48, molok Nazrudin marka golu ba dala rua iha minutu 58, hodi muda skor ba 4-0.

Assalam FC hetan vantajen boot liu tan wainhira Elvis Klau husi YMCA marka golu ba ninia redi rasik iha minutu 78 hodi haboot vantajen Assalam nian ba 5-0.

Christian Pena nebe joga ona iha Assalam desde epoka 2016, kompleta rejultadu final ba 7-0 liu husi golu nebe nia marka iha minutu 80 no 83.

Ho clean sheet nebe mak Marcos Horizon rejista hasoru YMCA, ida nee ba dala rua ona tamba iha jogu hasoru Sporting Timor mos guarda redi esperienti nee a sofre golu wainhira Asslam manan SCT ho skor 3-0.

Ho rejultadu ida nee, Assalam FC sae ba pozisaun runner-up Pool B nian ho total pontu 6, rejultadu husi lakon dala ida no manan dala rua.

YMCA fali okupa pozisaun ikus liu, pozisaun 7 ho pontu 1, rejultadu husi lakon dala rua no impata dala ida.

FO KOMENTARIU