DIT FC Okupa Pozisaun Rua Hafoin Manan Kablaki FC 9-1

19
Ekipa DIT FC iha epoka 2016

Jose Santos Husi DIT FC Marka Tan Gou Haat, nunee ba dala rua tui tuir malu ona mak jogador nee marka Quat-rick; record furak iha jogu LFA nian too agora.

(boletim24.com) – DIT FC hahu hatudu hikas ninia favoritizmu iha Divizaun II hafoin sempre manan rua jogu ikus ho skor boot, manan Santa Cruz FC 8-3 no manan Kablaki FC 9-1.

DIT FC parese aprende lisaun boot wainhira iha jogu abertura lakon 0-3 hasoru Nagardjo FC, tamba hafoin jogu ida nee, estudanti DIT sira sempre manan jogu ho skor nebe boot tebes.

Iha jogu ba dala tolu nian hasoru Kablaki FC nebe halao iha loron 07 Abril iha Estadio Municipal Dili, DIT FC manan kedas ho skor 9-1.

Iha primeira parte deit, DIT FC lidera ona jogu ho sor 3-0, no golu 3 nee marka husi jogador Jose Santos iha minutu 13 no 24, no jogador Boaventura marka golu ida iha minutu 28.

Tama ba segunda parte, Kablaki FC konsegue hamenus desvantajen ba 1-3 liu husi jogador Rizal Nurdin, nebe marka golu iha minutu 51.

Maibe liu deit minutu 1, dala ida tan Jose santos aumenta tan golu ida hodi haboot fali vantajen DIT nian ba 4-1.

Jose Santos, nebe iha jogu hasoru Santa Cruz FC marka ona Quat-rick, dala ida tan iha jogu ida nee marka Quat-rick ba dala rua tui tuir malu, wainhira iha minutu 55 marka ninia golu ba dala haat no aumenta vantajen DIT nian ba 5-1.

Joanico Bragansa no Inacio Zelasio kompleta rejultadu final 9-1, wainhira ida ida marka tan golu rua ba redi Kabaki FC nian.

Joanico marka golu iha minutu 60 no 83, enkuantu Inacio marka golu iha minutu 77 no 79.

Ho rejultadu ida nee, DIT FC sae ba pozisaun II Pool A nian ho total pontu 6, menus pontu ida ba Nagardjo FC nebe lidera klasifikasaun ho pontu 7.

DIT no Nagardjo, ida idak halao ona jogu 3, maibe Kablaki FC nebe hafoin rejultadu ‘todan’ ida nee okupa pozisaun 4 ho pontu 3, foin mak halao jogu 2.

PARABENS DIT FC NO FORSA KABLAKI FC!

FO KOMENTARIU