LFA 2017 Divizaun I Jornada 5: Goleador La Joga, Zebra FC La Marka Golu

262
Line-Up Zebra FC hasoru AS Ponta Leste

(boletim24.com) – Zebra FC konsegue tahan AS Ponta Leste ho skor 0-0 iha jogu kontinuasaun LFA 2017 Divizaun I jornada 5 nian, nebe halao iha domingu loron 02 Abril 2017, iha Estadio Municipal Baucau.

Iha jogu nee rasik, melhor markador ba ekipa Zebra nian, brazileiru Marcos de Lima, nebe marka ona golu 4 la partisipa iha jogu nee tamba akumulasaun kartaun kinur.

Marcos de Lima marka golu 4 nee iha jogu 4 nebe nia partisipa ona. Jogador mediu ofensivu nee hahu marka golu iha jogu abertura LFA 2017 nian hasoru AD SLB, tuir mai marka golu 2 wainhira Zebra FC manan Porto FC 4-1.

Golu ba dala 4 nian Marcos marka wainhira Zebra FC tahan Cacusan FC ho skor 1-1 iha jogu jornada 4.

Maske la konsegue marka golu, maibe rejultadu impata 0-0 hasoru AS Ponta Leste tulun ona klubu kuluguisa nee provizoriamente sai ona husi zona degradasaun.

Hafoin too jornada 5, Zebra FC akumula ona pontu 5, rejultadu husi lakon dala rua, manan dala 1 no impata dala rua.

Iha sorin seluk, ho rejultadu ida nee, AS Ponta Leste tun ba pozisaun 4 ho total pontu 6, rejultadu husi manan dala ida, lakon dala ida no impata dala 3.

FO KOMENTARIU