LFA 2017 Divizaun I Jornada 4: Auto-Golu Salva Cacusan FC Hodi Tahan Zebra FC 1-1

129
Ekipa Inisial Zebra FC iha jogu hasoru Cacusan FC. Marcos de Lima, 1 husi liman karuk (hariik oin) marka golu 1, total marka ona golu 4 | imajen: Zebra FC

(boletim24.com) – Klubu kampiaun Divizaun II ba epoka 2016, nebe agora dau daun joga ona iha LFA Divizaun I, seidauk manan iha jogu 4 nebe partisipa ona.

Iha jogu jornada 4 nian hasoru Zebra FC nebe halao iha loron 26 Marsu 2017 iha Estadio Municipal baucau, klubu husi Becora nee hetan dala ida tan rejultadu impata, nunee impata ona dala haat tui tuir malu.

Zebra FC nebe joga iha nia uma rasik hetan apoiu forti husi adeptu no publiku husi Munisipiu Baucau, nunee fo motivasaun boot ba jogador sira hodi bele manan jogu difisil hasoru Cacusan FC.

Maske nunee, iha primeira parte rejultadu mak 0-0, maske klubu uma nain iha oportunidade lubuk ida nebe la konsegue konverte ba golu.

Tama ba segunda parte, jogador sira husi Zebra FC hakaas aan liu tan hodi fo amesa ba redi Cacusan FC nian.

Esforsu tomak nebe jogador sira uma nain nian halo konsegue hetan rejultadu wainhira jogador reforsu husi Brazil, Marcos de Lima marka golu iha minutu 67 hodi fo vantajen provizoriu ba nia klubu.

Ho golu ida nee, Marcos de Lima marka ona golu 4. Marcos marka golu 1 wainhira Zebra FC lakon 1-3 iha jogu abertura ho AD SLB, no marka golu 2 wainhira Zebra manan Porto FC 4-1.

Iha sorin seluk, Cacusan FC nebe antes jogu halao iha konfiansa boot katak sei manan Zebra FC buka nafatin hodi duni desvantajen golu 1 nee.

Maske ho presaun no amesa, jogador sira la konsegue fura baliza Zebra nian.

Maibe tristi ba Zebra Fc no Marcos, tamba iha minutu 79 Camilo Boavida ho deskuidu marka fali golu ba nia baliza rasik, nunee pontu 3 nebe iha ona matan laran tenki lakon.

Ho auto golu ida nee, jogador husi Cacusan FC senti haksolok ona tamba bele hases sira husi lakon. Too iha jornada 4, reforsu forti, nasional no tasi-balu, nebe cacusan FC kontratu ona seidauk hatudu sira nia majia hodi fo rejultadu pozitivu ba klubu husi Omega Viva nee.

Too jogu remata rejultadu finl mak 1-1.

Zebra FC okupa nafatin pozisaun 7 ho pontu 4, rejultadu husi lakon dala rua (hasoru AD SLB no Academica), manan dala ida hasoru Porto FC no impata hasoru Cacusan FC.

Cacusan FC rasik tur iha pozisaun 6 ho pontu 4, hanesan ho Zebra maibe iha diferensa golu nebe diak liu.

FO KOMENTARIU