PERFIL – Francisco Guterres Lu-Olo, Eis Prezidenti Parlamento Nacional Povu Hili Sai Prezidenti RDTL

349

(boletim24.com) – Francisco Guterres Lu-Olo sei simu posse nudar Prezidenti RDTL iha loron 20 fulan Maiu tinan 2017.

Iha tinan 15 liu ba Lu-Olo hetan fiar nudar Prezidenti Parlamento Nacional dahuluk hafoin Timor-Leste restaura ninia independensia iha loron 20 Maiu 2002.

Iha momentu neba, Lu-Olo rasik mak proklama restaurasaun independensia husi nasaun foun iha mileniu foun ho naran Republica Democratica de Timor-Leste, no tuir mai fo pose ba Prezidenti RDTL dahuluk hafoin restaurasaun, Kay Rala Xanana Gusmao.

Francisco Guterres Lu-Olo moris iha loron 07 Setembru 1954, iha Ossu, Munisipiu Viqueque.

Lu-Olo halao tempu barak husi nia moris nudar guerilheiru hodi funu hasoru soldadu Indonesiu sira, hafoin invazaun iha tinan 1975.

Hafoin kandidata nia aan ba Presidenti RDTL ba dala tolu, atual Prezidenti Fretilin nee konsegue manan maioria iha primeira ronda iha eleisaun nebe halao iha loron 20 Marsu liu ba.

Lu-Olo nudar lider partidu Fretilin ba dala tolu nebe sai nudar Prezidenti RDTL. Francisco Xavier do Amaral no Nicolau Lobato mak asumi uluk kargu Xefi Estadu nee hafoin proklamasaun independensia uniateral iha loron 28 Novembru 1975.

Lu-Olo asumi uluk kargu nudar Prezidente Assembleia Constituinte entre loron 15 Setembru 2001 no 20 Maiu 2002, molok lidera fali Parlamento Nacional.

Lider Fretilin nee hahu ninia Curso Direito iha Universidade Nacional Timor Lorosae wainhira sei lidera Parlamento Nacional no remata iha tinan 2011.

Hafoin remata mandatu nudar Prezidenti Parlamento iha tinan 2007, Lu-Olo hases-an husi Kargu Publiku duranti tinan balu nia laran, hodi dedika nia aan tomak ba Partidu Fretilin, too fulan Fevereiru 2014, wainhira hetan nomeiasaun nudar Prezidenti Comissão Preparatória Cimeira Chefe Estado No Governo CPLP nian.

Hafoin kompleta 4.ª classe iha Colégio Sta. Teresinha Ossú iha tinan 1969, Lu-Olo kontinua ninia estudu iha Liceu Dili too tinan 1973.

Hafoin remata ninia estudu iha Liceu Dili, Lu-Olo fila fali ba Colégio Sta. Teresinha Ossú hodi halao funsaun nudar Monitor Escolar too tinan 1974, no fila fali mai Dili tamba hakarak atu kontinua ninia estudu.

Iha loron nebe Indonesia Halo Invazaun iha 7 Dezembru 1975, Lu-Olo hases aan ba ailaran hamutuk ho populasaun sira iha nia rai, liu liu ninia kolega joven sira nebe mak nia tau konfiansa. Lu-Olo ba halibur hamutuk ho pelataun nebe komandu husi Lino Olkasa no hahu ninia moris nudar kombatenti ba Fretilin.

Lu-Olo nebe adere ona ba Partido Fretilin iha 1975, hetan nomeasaun nudar vice-secretário ba Ossú iha tinan 1976, no tuir mai okupa fali pozisaun secretario hafoin ninia colega nee inimigu kaptura.

Liu husi Reuniaun Dahuluk Comité Central da Fretilin (CCF) nian, Lu-Olo detakadu nudar Vice-Secretario Regiao Leste nian, funsaun nebe halo nia besik liu tan ba Xanana Gusmao.

Liu deit tinan ida, Lu-Olo hetan nomeiasaun nudar Vice-Secretario Partido Fretilin, no iha tinan 1978 halao funsaun nudar delegado Comissariado Sector Iha Ponta Leste, hamutuk ho kargu barak seluk husi Quadro Medio Fretilin nian nebe nia asumi.

Iha tinana 1982, Lu-Olo hetan nomeiasaun nudar adjuntu no koloka iha Região Centro Leste, no iha nebe mak nia integra ba Comando 3.ª Companhia Guerrilha, alein halao nafatin nia funsaun nudar Responsavel Politico, kargu nebe nia simu formalmente iha tinan 1984.

Iha tinan 1987, wainhira asumi hela funsaun ezekutivu rua nee, Lu-Olo transfere ba Regiao Cruzeiru (Same, Manatuto Oeste, Aileu no Díli).

Iha tinan 1997, hafoin Konis Santana mate, Lu-Olo asumi fali funsaun secretário Comissão Diretiva Fretilin, hodi prienxe kargu politico Fretilin nian iha rezistensia armada.

Wainhira Conselho Nacional da Resistência Timorense (CNRT) estabelese iha 1998, Lu-Olo akumula kargu sira henesan membro da Comissão Política Nacional do Conselho, secretário da Frente Política Interna, membro do Conselho Político Militar iha resistência armada hamutuk ho kargu sira nebe nia asumi iha Conselho Presidencial da Fretilin.

Hafoin funu remata, Lu-Olo hamutuk ho Forças Armadas de Libertação Nacional de Timor-Leste (Falintil) mai iha Aileu Villa.

Iha loron 26 Novembru 2000, Lu-Olo entrega ninia kilat AR-15 hamutuk ho municoes ba Comando Falintil no tun mai Dili hodi insentiva estabelesimentu Conferência Nacional da Fretilin, halo reorganizasaun ba estrutura baze partidu nian hodi prepara ba Congresso nebe halao iha fulan Julhu 2001, no eleitu nudar Prezidenti Partidu Fretilin.

Hafoin Fretilin manan iha eleisaun 30 Agostu 2001, Lu-Olo simu pose nudar membru Assembleia Constituinte no eleitu nudar Prezidenti ba Orgaun nee.

Iha loron 20 Maiu 2017, Lu-Olo sei sai Prezidenti RDTL ba dala 6 hafoin proklamasaun independensia 28 Novembru 1975 no Prezidenti RDTL ba dala 4 hafoin Restaurasaun Independensia.

PARABENS PREZIDENTI ELEITU DR. FRANCISCO GUTERRES LU-OLO!

(referensia: lusa.pt)

FO KOMENTARIU