UEFA Fo Reasaun Forti Ba Ekipa Arbitrajen Iha Jogu Barcelona – PSG

175

(boletim24.com) – Jornal desportivu husi Espanha, Marca, asegura katak Organizmu Futebol husi Europa, UEFA, sei foti asaun hasoru arbitru Aytekin nebe lidera jogu Barcelona-PSG iha kinta madrugada OTL.

Jornal nee mos haktuir katak arbitru nee iha posibilidade boot sei la partisipa ona iha jogu Champion League sira tuir mai.

Ekipa arbitrajen iha jogu nee hetan kritika makaas liu liu ba desizaun fo penalti 2 ba Barcelona no la marka penalti ba PSG.

Diretor Komite Arbitrajen UEFA nian, Pierluigi Collina, halo ona verifikasaun ba relatoriu arbitrajen iha jogu nee no sei foti desizaun ita loron hirak tuir mai.

Pierluigi Collina, eis arbitru, atual Diretor Komite Arbitrajen husi UEFA

Jornal Marca nebe utiliza fonte besik UEFA garante katak Collina sei la husik leet deit polemiku nebe involve arbitru Deniz Aytekin ho nia ekipa.

Haktuir mos jornal nee iha versaun online katak, UEFA sei la fo sansaun direta maibe sei adopta medidas hanesan hatun divizaun ba ekipa arbitrajen nee, ou bele mos la nomeia sira ba jogus sira tuir mai duranti tempu ruma nia laran.

Iha sorin seluk, prezidenti FIFA, Gianni Infantino, mos fo reasaun forti ba dezisaun kontroversial husi parte ekipa arbitrajen iha jogu second leg Oitavo-Final Champions league nee.

Presidenti FIFA Gianni Infantino

Tuir presidenti husi organizmu futebol mendial nee, jogu entre Barcelona no PSG nudar ejemplu katak presija duni hadia futebol liu husi utilizasaun Video Assistant Referee.

Presidenti FIFA nee mos fo nia reasaun ba polemiku oin oin nebe mosu iha jogu laran inklui Diving husi avansadu Barcelona, Luis Suarez, nebe produz golu dala 5 ba klubu katalaun nee.

FO KOMENTARIU