Manchester United Manan Taxa Liga Inglatera (League Cup)

63

(boletim24.com) – Manchester United konkista taxa League Cup hafoin manan Southampton iha final ho skor 3-2, iha estadio Wembley, segunda (27 fevereiru) madrugada Oras Timor-Leste.

Zlatan Ibrahimovic mak man of the match liu husi golu rua nebe nia marka ba Southampton iha final nee.

Zlatan marka golu dahuluk iha minutu 19 molok nia kolega ekipa Jesse Lingard aumenta vantajen ba 2-0 iha minutu 38.

Southampton hamenus desvantajen ba 2-1 antes periodu intervalu, wainhira jogador Manolo Gabiaddini marka golu iha minutu 45.

Iha segunda parte, Southampton konsegue halo surpreza no hatauk Red Devil tamba dala ida tan Manolo Gabiaddini marka golu lais iha minutu 48 hodi halo impata jogu ba 2-2.

Sorti ba Manchester United, tamba Zlatan Ibrahimovic sai heroi wainhira avansadu husi Swedia nee marka golu manan nian iha minutu 86.

Ho ida nee mak, Manchester United manan ona Taxa Liga (League Cup) ba dala 6, enkuantu ba treinador Jose Mourinho, manan titulu ou taxa ba dala 24 iha ninia kareira tomak nudar treinador profesional.

Husi total 24 nee, Special One manan hamutuk ho klubu hanesan FC Porto (6), Chelsea (8), Inter Milan (5) no Real Madrid (3).

Mourinho falta manan tan deit taxa ou titulu 1 atu bele tama ba treinador Top 5 nebe hetan titulu ou taxa barak liu.

Lista kona ba treinador ho taxa/titulu barak liu okupa husi Alex Ferguson (49), Mircea Lucescu (31), Valery Lobanovskiy (30), Jock Stein (26) no Ottmar Hitzfeld (25).

FO KOMENTARIU