Labele Fa’an Iha Estrada Publiku

76
Imajen - Ilustrasaun

(boletim24.com), DILI – Komisaun F Parlamentu Nasional ne’ebe trata assuntu saude no edukasaun preokupa maka’as ba kondisaun terminal sira iha Dili laran, tanba sempre mosu enfragamentu (kemacetan).

Deputadu Komisaun F, Eladio Faculto sente preokupa itoan ho kondisaun terminal Becora no Tasi Tolu, tanba terminal 2 (rua) ne’e sempre mosu enfragamentu.

“Terminal Tasi Tolu, ema fa’an to’o estrada ibun, depois kareta publiku sira atu para mos laloos,” preokupa Eladio ba Jornalista sira iha Parlamentu Nasional Dili foin lalais.

Deputadu FRETILIN ne’e hatutan, kondisaun ne’e la’os akontese de’it iha terminal Tasi Tolu, maibe akontese mos iha terminal Becora.

“Bus, taxi, mikroleta no Angguna sira ne’ebe para hadau malu no la fo fatin ba sira ne’e halo pasazen ba – mai. Ema atu liu de’it mos susar tebes,” esplika Eladio.

Ho kondisaun ne’e, Eladio husu ba Ministeriu Obras Publiku Transporte no Komunikasaun (MOPTK) tenke hadia nia jestaun ba terminal sira iha Dili laran inklui fatin estasionamentu sira hodi bele evita enfragamentu.

“Estrada públiku sira liu-liu mak terminal sira iha kapital Dili laran ne’e tenke livre nomos labele faan sasan iha estrada públiku nia ninin hanesan iha ponte leten nomos kareta sira ne’e labele para iha dalan klaran hodi halo enfragamentu de’it,” nia hatete.

Eladio mos sujere ba MOTPK no Ministeriu Komersiu Industria no Ambiente (MCIA) tenke koolabora atu oinsa bele rezolve negosiante sira ne’ebe kontinua fa’an sasan iha estrada publiku sira. (ino)

FO KOMENTARIU