AFF Futsal Championship: Thailandia Kampiaun, Timor-Leste Pozisaun 4

33

(boletim24.com) – Selesaun uma nain AFF Futsal Championship mak kampiaun ba eventu boot Futsal nian iha Asean.

Thailandia manan taxa AFF Futsal Championship ba dala 12 hafoin halakon Myanmar ho skor 8-1, liu husi jogu nebe halao iha Indoor Stadion Huamark, Bangkok, Thailandia, iha loron 29 Janeiru 2017.

Desde kompetisaun AFF Futsal Championship hahu halao iha 2001, Thailandia manan ona 12 husi total 13.

Thailandia la manan deit eventu AFF Futsal Championship iha 2010. Momentu neba selesaun Thailandia la tuir kompetisaun AFF Futsal Championship tamba prepara hela ba Copa Mundial Futsal 2010.

Iha 2010, selesaun Futsal Indonesia mak sai kampiaun ba kompetisaun Futsal nivel Asean nee.

Thailandia hatudu ona ninia kbiit makaas iha Futsal nivel Asean no Asia.

Thailandia mos manan ona Medalia Ouru ba Futsal iha Sea Games 2011 no okupa pozisaun runner-up iha eventu Futsal nivel Asia iha 2012.

Prestasaun furak seluk nebe selesaun Futsal Thailandia nian konsegue atinji ona mak faze oitavo-final husi Copa Mundial Futsal 2016.

Thailandia konsegue hetan rejultadu furak iha Futsal nivel Asean tamba iha Liga Profesional no mos hetan apoiu maximu husi parte Governu.

Iha sorin seluk, Timor-Leste konsegue marka historia iha Futsal nivel Asean tamba ba dahuluk hakat ba semi-fina, hafoin manan Brunei DS ho skor 8-6.

Maske lakon iha semi-final hasoru Myanmar ho skor 3-8, maibe prestasaun ida nee diak ona hare ba kondisaun minima nebe Timor-Leste infrenta.

Timor-Leste okupa pozisaun 4, hafoin lakon hasoru selesaun Malasya ho sor 1-8, iha jogu hodi hadau pozisaun 3 no 4.