Falha Iha Bateria Mak Provoka Samsung Galaxy Note 7 Rebenta

20

(boletim24.com) – Hafoin halao investigasaun duranti fulan balu nia laran hodi halo verifikasaun ba kauza husi smartphone ho marka Galaxy Note 7 rebenta iha konsumidor sira nia liman, kompanhia Samsung publika rejultadu husi investigasaun nee iha loron 23 Janeiru 2017 liu ba.

Rejultadu husi investigasaun nebe kompanhia smartphone husi Koreia Sul nee halao hatudu katak falha iha bateria mak provoka Galaxy Note 7 rebenta.

Kazu Galaxy Note 7 rebenta akontese ba konsumidor lubuk ida iha tinan 2016, no obriga kompanhia nee tenki dada fila fali marka telemovel Galaxy Note 7 husi merkadu iha 2016.

Tamba iha momentu neba kazu Galaxy Note 7 rebenta akontese ba konsumidor barak, mak Samsung disidi hodi halo investigasaun no iha tempu hanesan foti desizaun difisil hodi hapara produsaun husi marka telemovel nee.

Alein nee kompanhia aviasaun barak mak la fo permisaun ba pasajeiru sira hodi lori tama telemovel ho marka Samsung Galaxy Note 7 ba aviaun laran, hafoin akontese kazu Galaxy Note 7 rebenta iha konsumidor sira nia liman.

Desizaun husi Samsung hodi dada fila fali Galaxy Note 7 husi merkadu no hapara produsaun husi marka telemovel nee fo impaktu makaas ba rendimentu husi kompanhia nee, nebe tuir estimasaun lakon lukru ho total osan euro milhaun 4.863.

Responsavel ida iha kompanhia Samsung, Koh Dong-jin, liu husi komuniadu imprensa fo esplikasaun katak, kompanhia disidi fo sai rejultadu investigasaun nee ba publiku tamba Samsung presija atu rekupera fila fali konfiansa husi konsumidor sira.

FO KOMENTARIU