Apple, Microsoft, Facebook, Netflix No Google Kontra Donaldo Trump

38

(boletim24.com) – Empreza teknolojia boot husi America nebe fo servisu ba imigrante rihun ba rihun deklara sira nia protestu kontra dekretu husi prezidenti Donald Trump nebe bandu imigrante iha Estados Unidos America.

Empreza teknolojia sira nee mak Apple, Microsoft, Facebook, Netflix No Google. Empreza sira nee hatoo ona sira nia protestu iha media, liu liu media social.

“Apple la susesu wainhira la iha imigrante sira”, diretor-jeral husi Apple, Tim Cook, hateten iha dokumentu interna nebe media AFF hetan asesu.

Matebian Steve Job, fundador husi Apple,mos moris husi familia imigrante ida husi Siria.

Alein Tim Cook no Mark Zuckerber husi Facebook, maioria empreza teknolojia hahu hamrik hodi hatoo sira nia protestu ba presidenti Donald Trump nia desizaun hodi bandu imigrante iha EUA.

“Donald Trump nia desizaun afeta tebes trabalhador husi Netflix iha mundu tomak”, diretor-jeral husi Netflix, Reed Hasting, hatoo nia hanoin iha pajina Facebook.

Iha sorin seluk, diretor-jeral husi Google, Sundar Pichai, hateten katak ninia funsionariu hamutuk 187 afeta diretamente husi desizaun foun husi presidenti EUA.

“Ami prekupa tebes ho impaktu husi dekretu nee no kualker proposta nebe bandu funsionariu Google nian ho sira nia familia”, hateten Google.

Dekretu prezidenti Trump nian nebe hahu vigor ona iha sexta-feira kalan (27 Janeiru 2017), bandu sidadaun husi Iran, Iraque, Iemen, Somalia, Sudaun, no Libia atu tama ba Estados Unidos America.

Sidadaun husi Siria mos la bele tama ba Estados Unidos America too iha fali orden foun husi prezidenti. Nunee mos sei la iha refujiadu ida mak bele tama ba UEA pelu menus duranti loron 120 nia laran.

Ba tempu badak nia laran, empreza teknolojia sira nee hasoru hela situasaun emerjensia no sira sei fo asistensia legal hodi bele tulun funsionariu imigrante sira nee.

“Ami sei determina impaktu ba ami nia funsionariu sira no sei buka atu proteje sira no sira nia familia”, Facebook hateten ba AFP.

FO KOMENTARIU