Timor-Leste Hili Prezidenti RDTL Foun Iha Loron 20 Marsu 2017

58

(boletim24.com) – Tuir kalendariu nebe fo sai ona husi STAE, hanesan publika iha website ofisial governu nian, eleisaun prezidensial sei halao iha loron 20 Marsu 2017.

Sidadaun elijivel nebe hakarak kandidata nia an ba Prezidenti Republika tenki hatama ona ninia kandidatura ba Tribunal Rekursu too loron 5 Fevereiru 2017.

Tribunal Rekursu sei fo rezultadu rejistu kandidatura ba STAE no CNE iha loron 18 Fevereiru 2018. Iha loron hanesan, STAE sei fo sai ba publiku numeru no fatin sentru votasaun inklui estasaun votasaun husi eleisaun prezidensial periodu 2017-2022.

STAE sei publika naran husi kandidatu ba eleisaun prezindesial RDTL entre loron 19 Fevereiru no 21 fevereiru 2017.

Kandidatu ida idak sei hahu halao sira kampanha eleitoral duranti semanan rua, hahu husi loron 3 Marsu too 17 Marsu 2017.

Loron 20 Marsu 2017 sidadaun hotu hotu nebe elijivel no tuir ona resensiamentu sei fo sira nia diretu votu ba kandidatu nebe sira fiar katak iha kapasidade no integridade atu sai aman nebe diak ba nasaun RDTL.

Hafoin halao eleisaun, entre loron 23 Marsu too 25 Marsu, CNE sei responsabiliza ba apuramentu final husi rejultadu eleisaun prezidentisil.

Tuir mai iha loron 2 Abril, rejultadu final husi eleisaun prezidensial sei publika iha Jornal Republika.

Wainhira la iha kandidatu ida maka hetan maioria absoluta iha ronda dahuluk nian, sei loke fila fali prosesu votasaun ba ronda daruak nian.

Tribunál Rekursu fó sai Avizu, hodi indika kandidatu sira ba faze daruak eleisaun nian no prosede ba sorteiu kandidatura nian sira, ba ordenasaun iha boletin votu nian;

Kandidatu sira nebe hakat ba ronda daruak sei iha tempu atu halao fila fali kampanha eleitoral husi loron 3 Abril too 17 Abril 2017, no iha loron 20 Abril sidadaun hotu hotu nebe elijivel no tuir ona resensiamentu sei halo tan votasaun ba daruak hodi hili prezidenti RDTL ba periodu 2017-2022.

CNE sei halo apuramentu ba rejultadu final husi eleisaun ronda daruak entre loron 23 Abril no 25 Abril 2017, no rejultadu final husi eleisaun ronda daruak sei fo sai dala ida tan iha Jornal Republika iha loron 3 maiu 2017.

Prezidenti RDTL eleitu foun sei simu tomada pose iha loron restaurasaun independensia, 20 Maiu 2017.

FO KOMENTARIU