Aprende Husi 2012, PSD Prontu Kompete Iha Eleisaun 2017

217

Joao Mendes Goncalves no Reinaldo Borges eleitu nudar Prezidenti no Sekretariu Jeral ba Partidu Sosial Demokrata (PSD)

(salvioonline.com), DILI – Partidu Sosial Demokrata (PSD) hasoru politika ondas bo’ot (derota) iha eleisaun jeral 2012 ne’ebe lakonsege hetan asentu iha Parlamentu Nasional, maibe oras ne’e prontu ona hodi kompete iha eleisaun jeral ne’ebe sei akontese iha 2017 ho promesa prezidente eleitu Joao Mendes Goncalves ba periodu 2019.

Pakote primeiru ho nia estrutura mak Joao Mendes Goncalves ba Prezidente no nia Sekretariu Jeral mak Reinaldo Borges manan iha terseiru kongresu PSD ho total votus hamutuk 382 no pakote tuir mai mak Pedro Turquel ho nia sekjen Benjamin Barreto ho total votus 297. Terseiru kongresu ne’e partisipa husi estrutura no delegadus husi Munisipiu 12 inklui Rejiaun Espesial Administrativu Oe – Cusse Ambeno.

Loron primeiru ba terseiru kongresu PSD nian ho tema ho sosial demokrasia povu sai di’ak hetan partisipasaun husi Prezidente Partidu CNRT, Kay Rala Xanana Gusmao, Prezidente CNE, Jose Belo, Prezidente Frente – Mudansa, Jose Luis Guterres no delegasaun balun husi partidu ASDT no Sekretariu partidu FRETILIN, Mari Alkatiri.

Prezidente PSD, Joao Mendes Goncalves atual eis Ministru Ekonomia no Dezenolvimentu (MED iha mandatu governu AMP preokupa itoan ho revizaun ba lei partidu politiku ne’ebe iha mudansa maka’as kona – ba bareira husi 3% sa’e 5%.

“Ida ne’e difikulta liu ba partidu foun sira ne’ebe foin mak atu rejista, maibe ami prontu katak ami sei esforsu maka’as atu bele ultra – passa bareira ne’ebe mak iha,” hatete Joao Mendes Goncalves ba Jornalista sira iha salaun apuramentu PSD, Dili.

Antes ne’e eis Prezidente CNE, Jose Belo hatete, CNE preokupa tebes ho kondisaun moris PSD nian iha eleisaun 2012 no espera katak iha eleisaun 2017 bele hetan progressu di’ak.

“CNE preokupa, tanba Estadu mos gasta osan barak ba partidu politiku sira. Tanba ne’e mak husu ba partidu politika sira persija prepara a’an hodi bele kompete iha eleisaun tuir mai,” nia hatete.

Iha fatin hanesan, Prezidente partidu CNRT, Kay Rala Xanana Gusmao rekonhese tebes kontribuisaun partidu PSD nian durante mandatu governu Aliansa Maioria Parlamentar (AMP) ne’ebe hasoru situasaun difisil.

“PSD mos hola parte ba rezolve problema refujiadu sira iha tempu ne’eba, tanba ita hasoru hela problema krize 2007 nian, entaun husu ba foin sa’e sira tenke unidus hodi hadia partidu ne’e oin,” hatete Xanana.

“Iha AMP, PSD mos halo historia. Problema bo’ot no problema barak mak mosu no akontese, maibe konsege rezolvidu,” rekonhese Xanana.

Historikamente, lakon iha eleisaun jeral 2012 nian, maibe konsege involve iha kuartu governu konstitusional ne’ebe hanaran Aliansa Maioria Parlamentar (AMP) ne’ebe lidera husi Kay Rala Xanana Gusmao.

Parte balun konsidera PSD komesa naksobu no rahun bainhira eis Ministra Justisa, Lucia Lobato tama ba prijaun, tanba provadu halo korupsaun no eis deputadu Fernando Dias Gusmao haksoit sai hodi harii hikas Partidu Dezenvolvimentu Nasional (PDN) iha eleisaun 2012 nian. PSD mos hasoru problema interna hanesan eleisaun ba lider partidu sira. Parte balun kontra lideransa Zacarias Albano da Costa nian.

Figura importante sira ne’ebe iha PSD nia laran oras ne’e mak eis Ministru Ekonomia no Dezenvolvimentu (MED), Joao Mendes Goncalves iha mandatu governu AMP nian. Mario Viegas Carascalao, Maria Paixao, Lucia Lobato no seluk tan.

Maske hasoru problema barak tantu iha partidu laran rasik no lakon iha eleisaun jeral 2012, maibe PSD komesa konsolida nia a’an ona durante loron rua, 30 to’o 31 Janeiru iha salaun apuramentu CNE nian.

Iha eleisaun Parlamentu iha 30 Agostu 2001, PSD hetan votus 8,2% no konsege hetan asentu 6 husi kadeira 88. Iha eleisaun 2007, PSD halo aliansa ho Asosiasaun Sosial Demokrata Timor (ASDT). Husi aliansa ne’e konsege hetan votus 15,73% hodi hetan kadeira 11 iha Parlamentu Nasional. PSD harii husi Marioa Viegas Carascalao, Zacarias Albano da Costa no Leandro Isaac iha loron 20 Setembru 2000. Husi 7 Dezembru 2008, PSD lidera husi Prezidente Zacarias Albano da Costa. (**)

LEE TOO HOTU
FO KOMENTARIU