D’academy Asia 2: La Iha Surpreza, Weni Mak Manan Kompetisaun Dangdut Nivel Asia

40

(salvioonline.com) – Kompetisaun dangdut nivel Asia nebe partisipa husi nasaun 6, hanesan Timor-Leste, Brunei DS, Thailandia, Singapura, Malasya no uma nain Indonesia, nebe hahu husi fulan Outubru 2016 hetan ona vencedor.

Husi total konkorentes hamutuk 36 husi nasaun 6, kada nasaun kompostu husi konkorenti nain 6, ikus mai konkorenti nain 3 husi Indonesia, Irsya, Weni no Rani mak konsegue tama ba Grand Final.

Konkorenti estrela husi Timor-Leste, Maria Vitoria, konsegue hakat too Top 4. Maske la passa ba Grand Final, Timor-Leste orgulhu no apresia MarVi nia partisipasaun, tamba maske laos artista ho baze genre dangdut, nia bele hakat too Top 4.

Eventu final ba faze Grand Final halao iha loron 29 Dezembru, ho konkorenti nain tolu husi Indonesia, Irsya, Weni, no Rani.

Konkorenti nain 3 nee esforsu aan makaas iha kada atuasaun nebe sira hatudu iha komentador no juri sira nia prejensa iha Studio 5 Indosiar nian.

Husi konkorenti nain 3 nee, Weni mak hetan apresiasaun makaas husi komentador no juri sira ba nia atuasaun nebe nia hatudu.

Weni merese manan kompetisaun nee tamba hatudu atuasaun fantastika iha Final.

Weni akumula total pontu 2271 husi juri nain 6 nebe marka prejensa iha Studio 5 Indosiar. Rani hetan pozisaun runner up ho total pontu 2220. Ikus liu, Irsya, nebe mak favoritu atu manan kompetisaun nee, okupa deit pozisaun 3 ho total pontu 2212.

Nudar manan nain ba Dangdut Academy Asia 2, Weni iha direitu ba premiu osan hamutuk Rp milhaun 150 no premiu sira seluk nebe patrocinador husi kompetisaun nee sei fo. Rani iha pozisaun runner up iha direitu ba premiu Rp milhaun 100 no premiu sira seluk husi patrocinador, enkuantu Irsya sei simu premiu osan ho total Rp milhaun 50 no premiu sira seluk.

PARABENS WENI!

FO KOMENTARIU