Cristiano Ronaldo Tulun Familia Vitima Konflitu Iha Aleppo, Siria

75

(salvioonline.com) – Estrela futebol mundial husi Portugal, Cristiano Ronaldo, tulun familia vitima husi konflitu Siria, liu liu iha sidade Aleppo nebe hetan impaktu makaas husi konflitu nee.

Kapitaun selesaun Portugal sei halo doasaun ba familia vitima iha sidade Alepo ho hahan, ropa no mos kuidadus saude.

Cristiano Ronaldo nebe atrai ona fans futebol milhaun ba milhaun iha mundu duranti tinan hirak nee nia laran, mos konhesidu ho nia laran luak.

Hahu husi nia istoria kona ba lakohi halo ‘Tatoo’ iha nia isin lolon tamba sempre halo doasaun ran, too asaun karidade bar barak seluk nebe nia halo ona, la iha duvida katak Lionel Messi nia Rival rohan laek ida nee konsidera nudar ema laran luak no laran diak tebes.

Labarik Orfonatu Iha Siria Agradese Cristiano Ronaldo nia Tulun

Iha asaun karidade ikus liu, jogador portugues nee tulun familia vitima konflitu iha Alepo no teritoriu seluk iha Siria nebe hetan sofrimentu boot tamba impaktu husi funu nebe too agora seidauk hotu.

Organizasaun Save the Children haktuir katak jogador Real Madrid nebe iha inisiu fulan Dezembru manan Bola Osan Mean edisaun 2016, tulun familia afetadu ho hahan, ropa no kuidadus saude.

Liu husi video nebe Cristiano hatama iha media social, eis jogador Manchester United no Sporting Lisbon nee hateten:

“Hau nia tulun ida nee fo ba labarik sira iha Siria”.

“Ami hatene katak imi hetan sofrimentu barak ona. Hau jogador nebe famozu iha mundu, maibe imi mak heroi lolos. Labele lakon imi nia esperansa. Ami hotu sempre hamutuk ho imi. Ami sei tau matan ba imi. Hau hamutuk nafatin ho imi”.

Diretor husi organizasaun Save The Children, Nick Finney mos halo ona konfirmasaun kona ba tulun husi Cristiano Ronaldo ida nee.

“Cristiano ROnaldo nia laran luak tulun ona ami atu fo apoiu ba labarik sira iha Aleppo no teritoriu tomak iha Siria nebe sofre makaas ona husi funu ida nee”.

“Ami agradese tebes ba Cristiano nia apoiu ida nee. Ronaldo laos deit figura desportu nebe famozu tebes, maibe nia mos nudar sinal esperansa nian ba labarik feto no mane milhaun ba milhaun iha mundu tomak, no esperansa mak buat nebe labarik sira iha Siria agora dau daun presija tebes”.

Bravo Roanldo!