D’Academi Asia 2 Top 4: Maske La Tama Grand Final, Maria Vitoria Mak Kampiaun Ba Timor-Leste

54

(salvioonline.com) – Maske hatudu atuasaun furak iha konsertu result show husi faze to 4, no hetan apresiasaun husi komentador sira, maibe Maria Vitoria la konsegue hakat ba Grand Final tamba la hetan pontu sufisienti husi Juri nain nee, nebe kompostu husi Timor-Leste, Brunei Ds, Singapura, Malasya, Thailand no Indonesia.

Iha faze Top 4, Maria Vitoria hetan konkorensia forti husi artista Indonesia nain 3, Weni, Rani no Irsya. Maria sempre hatudu atuasaun fantastika duranti konsertu 2, show no result show.

Iha konsertu Show, nebe halao iha loron 25 Dezembru, Maria Vitoria okupa pozisaun 3 no liu pontu 6 ba Irsya iha pozisaun 4.

Rejultadu ida nee aumenta espektativa husi Timor Oan hotu katak Marvi iha possibilidade boot hakat ba Grand Final.

Maibe infelizmente, Maske Marvi ho nia esforsu tomak hananu ho diak tebes iha konsertu Result Show, nebe halao iha loron 26 Dezembru, no hetan Standing Oviation husi komentador, maibe juri sira fo avaliasaun nebe oin seluk hare ba konkorensia nebe mak forti tebes iha faze Top 4 nee.

Maske Maria Vitoria la konsegue hakat ba Grand Final, maibe nudar konkorenti husi Timor nebe la iha baze ba muzika dangdut, no konsegue hakat ba Top 4, ida nee nudar orgulhu boot ba Timor-Leste.

Timor Oan hotu kontenti no satisfeitu ho Maria Vitoria nia prestasaun iha partisipasaun dahuluk ba kompetisaun muzika dangdut nivel Asia nee.

Futuru nebe brilhanti hein hela Maria Vitoria. Hein Katak Maria Vitoria bele aplika iha nia moris lisaun hotu hotu nebe nia aprende duranti nia partisipasaun iha D’Academy Asia 2.

Parabens Maria Vitoria ba prestasaun Murak ida nee!