Biodata badak husi Madre Teresa

82

Papa Francisco deklara Madre Teresa husi Calcutta, India, nudar SANTA, liu husi cerimonia kanonizasaun iha domingo, loron 4 Setembro 2016, iha Vaticano, Roma, Italia.

SALVIO ONLINE – Madre Teresa moris iha loron 26 fulan Agostu 1910, iha Agnes Gonxha Bojaxhiu, Skopje, Macedonia. Madre Teresa mak feto ikun husi maun alin hamutuk nain 3. Maske ho tinan kiik, Madre Teresa partisipa no ativa ona iha grupu joven nebe padre Jesuita sira organiza, nebe bolu ho naran Solidariedade. Grupu nee mak ikus mai loke nia neon hodi halao nia servisu nudar madre misionaria.

Wanhira Madre Teresa halo tinan 17, nia tama ba konventu Irmãs de Loretto, no ikus mai superior sira haruka nia nudar misionaria ba Calcutta, India. Iha Calcutta nia hanorin iha Eskola sekundaria ida. Wanhira Madre Teresa hetan moras Tuberculosa (TBC), superior sira haruka nia ba deskansa iha rai ida naran Darjeeling. No iha nia deskansa fatin mak nia hahu senti katak Maromak bolu nia atu halo servisu seluk, tan nee nia desidi sai husi conventu Irmãs de Loretto no hahu moris iha ema kiak sira nia leet.

Vaticano iha momentu neba fo permisaun ba Madre Teresa hodi sai husi conventu Irmãs de Loretto no hahu halao nia vokasaun foun tuir orientasaun husi Arcebispo Calcutta nian.

Hafoin sai husi conventu Irmãs de Loretto, Madre Teresa hahu hela no halao nia servisu iha ema kiak sira nia leet, hanorin labarik kiak sira, no kura ema moras sira iha sira nia uma. Liu tiha tinan ida, ninia estudante balu mai hamutuk ho nia hodi tulun ema moras no kiak sira nebe moris estrada ninin.

Iha tinan 1950, Madre Teresa harii kongregasaun Missionárias da Caridade iha diocese Calcutta. Liu tiha tinan 2, iha 1952, governu oferese ba sira uma ida hodi sira bele kontinua halao sira nia misaun hodi tulun ema kiak no moras sira iha Calcutta.

Kongregasaun Missionárias da Caridade dezenvolve ho lalais.

Madre Teresa mos fo hela fatin ba prostituta sira, feto sira nebe hetan agresaun fizika, orfonatu ba labarik kiak sira, no mos fo hela fatin ba ema sira nebe sofre moras AIDS.

Madre Teresa mos defende makaas labarik sira nebe seidauk moris, nia famozu ho nia liafuan hanesan nee: “SEKARIK IMI RONA IHA FETO BALU NEBE LAKOHI ATU HAKIAK SIRA NIA OAN NO HAKARAK ATU HALO ABORTU, FAVOR IDA KOKO KONVENSE SIRA ATU LORI SIRA NIA OAN MAI FO BA HAU. HAU SEI HADOMI LABARIK NEE, NO HARE NIA NUDAR SINAL DOMIN MAROMAK NIAN.

Madre Teresa Mate iha loron 5 fulan Setembru 1997. Liu tiha tinan 6, iha 2003, Papa Joao Paulo Segundo deklara Madre Teresa nudar BEATA. No iha domingo, loron 4 fulan Setembru 2016, Papa Francisco deklara Madre Teresa nudar SANTA.

(referensia: Agencia Notisia Catolica)

FO KOMENTARIU